महाराष्ट्र राज्यात अनुसूचित जमातीतील साक्षरतेचे प्रमाण 52.2 टक्के (पुरुष 67 टक्के व स्त्रिया 43.1 टक्के) आहे. उच्च शिक्षणात प्रामुख्याने इंग्रजीचा वापर जास्त होत असल्याने अनुसूचित जमातीचे विद्यार्थी उच्च शिक्षणात मागे पडत आहेत व उच्च शिक्षणाच्या बदललेल्या वातावरणात त्यांना जुळवून घेणे कठीण होत आहे. जागतिकीकरणाच्या सध्याच्या वातावरणात इंग्रजीचे महत्त्व वाढत असून, अनुसूचित जमातीच्या विद्यार्थ्यांचा कल इंग्रजी माध्यमांकडे थोड्या प्रमाणात वाढत असला, तरी शहरातील इंग्रजी माध्यमांच्या नामांकित शाळेत शिक्षण घेणे त्यांच्या आर्थिक कुवतीपलीकडे आहे. यासाठी अनुसूचित जमातीच्या विद्यार्थ्यांना इंग्रजी माध्यमातून शिक्षण घेण्याची संधी मोठ्या प्रमाणात उपलब्ध करून देणे आवश्यक झाले आहे. यासाठी अनुसूचित जमातीच्या विद्यार्थ्यांना शहरातील इंग्रजी माध्यमाच्या नामांकित निवासी शाळांमध्ये शिक्षण देण्याची योजना राबविण्यात येत आहे.