राज्यातील अनुसूचित जमातीच्या युवकांना राज्य पोलीसदल व लष्कर तथा तत्सम विविध सुरक्षा दलातील अनुशेषांतर्गत संधी उपलब्ध करून देण्याच्या उद्देशाने राज्यात इगतपूरी, जव्हार, नंदूरबार, राजूरा, आंबेगाव, किनवट, देसाईगंज, धारणी, अकोले या 9 ठिकाणी पोलीस तथा सैन्यदल भरतीपूर्व प्रशिक्षण केंद्राची स्थापना करण्यात आलेली आहे. शारीरिक व शैक्षणिकदृष्ट्या योग्य असणा-या आदिवासी तरुण/ तरुणींना त्यांच्या कुटुंबाची आर्थिक व सामाजिक प्रगती होईल व त्यांचे जीवनमान उंचावे म्हणून सैन्यदल किंवा पोलीस दलात भरती होणेसाठी भरतीपूर्व प्रशिक्षण दिले जाते. आदिवासी प्रशिक्षणार्थींना जेवण, निवास, गणवेश, खेळाचे साहित्य, बुट-मोजे, अंथरूण-पांघरूण इत्यादी सुविधा मोफत पुरविल्या जातात. सैन्य तथा पोलीस दल भरतीपूर्व प्रशिक्षण केंद्रातील एका प्रशिक्षण सत्राचा कालावधी 4 महिन्यांचा असून प्रथम सत्र एप्रिल ते जुलै, द्वितीय सत्र ऑगस्ट ते नोव्हेंबर व तृतीय सत्र डिसेंबर ते मार्च या कालावधीत आयोजित करण्यात येते. एका प्रशिक्षण सत्रात 50 युवक व युवतींना प्रशिक्षण देण्यात येते.